Posted by 就到Lunch Time多啲時間嘅話，去酒店慢嘆個午餐就最好，一嚟人少少，二嚟又可以用相對平少少嘅價錢試下間餐廳，真係唔好食都無咁傷嘛﹗
今次就去咗Conrad Hong Kong 嘅 Brasserie on the Eighth 試佢嘅商務午餐。3道菜價格為 $468 + 10%，而4道菜價格則為 $488 +10%。質素係點？睇睇啲相呀﹗
3道菜同4道菜嘅分別，就係沙律吧同餐湯2選1或者2樣要哂 
3道菜價格為 $468 + 10%，而4道菜價格則為 $488 +10%。 
麵包 – 外脆內軟，熱食OK嘅，但唔好嘥個胃食太多。 
麵包 – 配上牛油及豬肝醬，個人覺得豬肝醬幾有驚喜，唔腥㗎﹗ 
沙律吧 – 有飽肚款式：意式肉腸、蛋餅及白酒煮青口 
沙律吧 – 蔬菜沙律 
沙律吧 – 冷盤…Parma Ham咸味配上哈密瓜鮮甜恰到好處，值得Encore；但釀蛋沙律配三文魚子則較為普通，唔突出 
沙律吧 – 相中較遠嘅帶子鮮蝦沙律同埋冷盤鮮蝦為必食款式，蝦非常彈口；沙律則少酸及少辣，非常開胃 
洋葱湯 – 芝士味濃烈，但不會蓋過牛肉湯嘅味道，而且亦唔算油膩 
洋葱湯 – 芝士迷必揀item 
龍蝦湯 – 龍蝦味濃，但上枱時覺得未算夠熱；同洋葱湯比較，我會選擇後者 
龍蝦湯 – 湯裏面嘅肉質都爽口 
主菜 – 烤澳洲羊架配迷迭香草汁
廚師火喉控制麻麻，叫五成，但兩次都做唔到五成效果 (一次近九成，另一次約七成)，但估唔到，就算九成熟都好，佢嘅肉質都算係JUICY，當然第二次生少少就再嫩口啲。
主菜 – 鴨肝汁煮傳統法式油封鴨腿配蘭度豆
本身就唔太好鴨腿，嫌佢太乾身，不過呢度煮出嚟嘅由肉就無相像中咁鞋口，而且鴨腿嘅皮亦鬆化，值得推介。
Cream Brulee – 職員大力推介，但我就覺得同Paul Lafayet無甚分別 
Chocolate and Amaretti Semifreddo – 呢個反而有啲驚喜，本身職員話會偏甜，但我又唔太覺得，唯獨係粟子肉較少咯。 
Black Coffee & Petits Fours – 我本身對呢啲咖啡無咩期望，不過呢杯又唔錯喎，香濃得嚟啲啡油都厚，掛哂邊，飲落搭上甜點真係埋到尾，唔會覺得爭啲嘢。
服務方面，個人覺得跟得好足下，初頭職員會推介下餐廳嘅招牌菜；見你枱面嘅嘢食到差唔多就會過嚟問吓你想唔想上下一道菜，羊架過熟講都未講完就幫手叫廚房再整過等等，全程有笑有禮貌，做足本份﹗
其實成五百幾蚊我就覺得唔係話好貴嘅，不過而家正值Hilton會員喺酒店內嘅餐廳有優惠 (普通會員及銀會籍會員：9折；金會籍會員及鑽石會籍會員：75折)，高級會員計落大約4百多就食到，我又覺得不妨去食吓喎。
唔係高級會員咁點？得9折嫌少？咁都仲有個方法8折嘅，就係下載Sino Club 應用程式免費做會員，會員喺港麗酒店旗下餐廳大部份有食品及飲品8折優惠㗎﹗<<優惠詳情>>
你哋又覺得點？不妨留言講吓呀﹗
記得follow埋我挨之：https://www.instagram.com/hotel_infinity/?hl=zh-hk
#ConradHongKong #港麗酒店 #Hilton #BrasserieontheEighth #酒店無限Touch #hotelinfinity
酒店無限Touch 