回復平靜 Conrad一遊

相信「金鐘三寶」之一嘅Conrad係近幾個月近幾個月較多人去嘅一間，無他嘅，AE嘅酒店消費回贈（消費$2000回贈$600，每張卡最多回贈$3000）先剛剛喺11月完結，不過我就為咗逃避人潮，所以喺12月頭先去住，回贈都唔要？回贈點好都唔及人流少好不過我都趁最後一刻拎到回贈

講返入住，今次check in非常快手，之前嘅兩三個月，就算喺閒日去都要拎飛仔排返10個8個，而家基本上你可以隨便揀邊位職員幫你，過程尚算順利。

我今次入住嘅就無包dining credit（住完之後，酒店又出返最抵玩嘅A Peace of Mind優惠，只需$1700+10%就會包埋$700dining credit)不過呢間Conrad都算係對會員最厚度嘅酒店之一，我本身只係Hilton集團嘅Gold member，只能夠免費享用早餐，但佢哋都好好咁upgrade咗我去行政樓層嘅房間，Gold member只要入住行政樓層房間，亦都可以享用埋行政走廊。

行政走廊包括早餐、下午茶同埋Happy Hour，由於我入住時剛好遇正政府實施六點後禁止堂食，所以下午茶時段就係14:00至16:00、Happy Hour就由16:00至18:00其實咁嘅安排，個肚又點頂得順呀。

講返個Executive Lounge嘅食物質素先，下午茶用英式三層架擺放，加上位於59樓嘅風景，淨係拎嚟打卡都已經叫唔錯；但我又好驚喜地咁講，佢嘅咸點清新得嚟又幾好味，而Scone亦都有驚喜，唔好講只係計Lounge嘅Scone，就算係好多Afternoon tea嘅scone都未必好過佢不過，佢嘅Clotted Cream就唔掂啦，可以話完全唔係個樣嘢。另外，呢度嘅咖啡亦都係出奇地香濃、香醇、甘香，一個字—凍熱都咁好飲！

食完Tea，我直接享用埋Happy Hour，基本上已經食唔落嘢，但都係咁咦拎咗少少嘢試下；其實款式都唔錯同特別，有西班牙蛋餅、炸黑松露飯糰、串燒…加埋一杯比較dry嘅sparking wine，話咁快就坐咗兩個鐘。

晚上又出現一個比較尷尬嘅插曲，基於太太有啲預計錯咗生理週期，而無準備到一啲必需品，唯有問下酒店有冇啦雖然堅係尷尬咁同一位男職員查詢，但酒店亦竟然表示可以提供給我太太送上嚟時只係用上酒店信封包住，相信係專登去尋找返嚟，衷心感激。

房間方面，空間感算唔錯，床同電視中間有一定嘅空間，就算你喺度做雙人yoga都夠位。另外，雖然間酒店有返咁上下歷史，但係，佢嘅電視機亦都算新款，可以無線接駁電話，睇Netflix都仲得！而床頭隔離亦有USU方便差電。廁所浴缸亦比較大，亦有微型電視機，俾你喺浸浴嘅時候都可以慢慢嘆電視。雖然游泳池同健身室都關閉，但房間內亦提供健身腳踏機，等你響房間都可以做些小運動。

早餐除咗可以喺Executive lounge享用之外，亦可以响樓下Cafe享用。個人絕對建議喺樓下享用早餐，原因係呢度有提供即時嘅煮蛋同埋粉面服務，食物款式亦相對較多一點。個人推介竟然係炒麵！因為佢煮出咗舊式粥舖嘅炒麵味道。而呢度嘅牛角包則比較普通，個人認為W Hotel嘅牛角包比較出色。

食飽咗早餐仲有一段時間咁做咩好呢？我同老婆就揀咗行一行個山啦天氣咁涼爽，行個簡單嘅路段上山頂絕對係一個好選擇！只要經過香港公園行去纜車徑，沿途有指示牌行舊山頂道，大約1小時便可上到山頂，欣賞香港景色。如果嫌唔夠喉，仲可以經薄扶林徑落山，喺薄扶林水塘完結，再坐返巴士返酒店。行完山返去沖過涼，再食多個Afternoon tea，我哋就check out啦！

雖然今次無包dining credit，但我食到最後嘅AE回贈，連埋送嘅executive lounge access，我就覺得幾抵玩啦。而上文講嘅A peace of mind package ，$1700+10%就會包埋$700 dining credit，仲要聖誕節都同價，真心可以諗諗呀！最後，不論覺得而家去staycation 危唔危險都好，大家都要注意衛生同做好自身嘅防禦措施呀！